पुणे | प्रतिनिधी
पुणे, दि.१२ : पुण्यातील बहुचर्चित असलेल्या चांदणी चौकातील नव्या उड्डाण पूलाचे आज केंद्रीय वाहतूक आणि रस्ते मंत्री नितीन गडकरी यांच्या हस्ते लोकार्पण झाले. यावेळी राज्याचे उपमुख्यमंत्री देवेंद्र फडणवीस, अजित पवार, पालकमंत्री चंद्रकांत पाटील आणि भाजपचे इतर नेते उपस्थित होते. पुण्याची वाहतूक कोंडी सोडवण्यासाठी हवेतून चालणाऱ्या गाड्यांची योजना आणणार असल्याचे आश्वासन गडकरी यांनी यावेळी भाषणात दिले.
दरम्यान, “पुण्यात सद्धा वाहतूक कोंडीची मोठी समस्या आहे. चांदणी चौकातील कामासाठीसुद्धा वाहतूक कोंडीमुळे बरेच अडथळे आले, तर ही समस्या कायमची सोडवण्यासाठी आपण नवी योजना करणार आहोत. हवेतून चालणाऱ्या बस आपण येथे आणणार असून या स्काय वॉक बसमधून एका वेळेस २५० प्रवासी प्रवास करू शकतात. असं आश्वासन गडकरी यांनी यावेळी दिलं.
पुण्यात वाहनांची संख्या वाढली असल्यामुळे वाहतूक कोंडीचा प्रश्न निर्माण झाला आहे. आता पुण्यात वाहनांची संख्या वाढवू नका. कारण इथे खूप प्रदूषण झाले आहे. आपल्याला पेट्रोल व डिझेल देशातून हद्दपार करायचे आहे. त्यामुळे 40% प्रदूषण कमी होईल असं गडकरी म्हणाले.
व्हीआयपी कल्चर गेलं पाहिजे, सायरनचा कर्कश आवाज गेला पाहिजे, एकंदरीत पुण्यातील वाहतूक कोंडी कमी करण्यासाठी अनेक योजना आहेत. त्यापैकी रिंग रोडही लवकरच पूर्ण होईल, मेट्रोचे कामही आता शेवटच्या टप्प्यात आहे, तर आपण स्कायवॉक बसची योजना आणणार असल्याचे नितीन गडकरी म्हणाले आहेत.
उद्घाटनानंतर चांदणी चौकातील उड्डाणपूल हा वाहनांसाठी खुला करण्यात आला आहे. या उड्डाणपूलामुळे चांदणी चौकात दैनंदिन पातळीवर होणाऱ्या वाहतूक कोंडीचा प्रश्न मार्गी लागणार आहे.
