पुणे, दि. ०६ : पिंपरी – चिंचवड ॲडव्होकेटस् बार असोसिएशन तर्फे कायदेविषयक व्याख्यानमाला आयोजित करण्यात आली होती. या कायदेविषयक व्याख्यानमालेत ‘वकिली व्यवसायातील संधी’ या विषयावर विधिज्ञ बार कौन्सिल ऑफ महाराष्ट्र अॅण्ड गोवाचे उपाध्यक्ष ॲड. डॉ. उदय वारुंजीकर बोलत होते.पिंपरी – चिंचवड शहरातील निर्बंध नागरीकरण ही वकिलांसाठी संधी आहे!” असे प्रतिपादन त्यांनी नेहरूनगर न्यायालय सभागृह, पिंपरी येथे शुक्रवार, दिनांक ०४ ऑगस्ट २०२३ रोजी केले.
यावेळी ज्येष्ठ विधिज्ञ ॲड. मदनलाल छाजेड कार्यक्रमाच्या अध्यक्षस्थानी होते. ज्येष्ठ विधिज्ञ ॲड. सुरेंद्र शर्मा, पिंपरी – चिंचवड ॲडव्होकेटस् बार असोसिएशनच्या उपाध्यक्ष ॲड. जयश्री कुटे यांची व्यासपीठावर तसेच माजी अध्यक्ष ॲड. सतिश गोरडे, ॲड. सुशील मंचरकर, ॲड. सुदाम साने यांच्यासह असोसिएशनचे आजी-माजी पदाधिकारी, सहकारी वकील बंधू आणि भगिनी इ. मान्यवर उपस्थित होते.
पिंपरी – चिंचवड ॲडव्होकेटस् बार असोसिएशनचे अध्यक्ष ॲड. नारायण रसाळ यांच्या प्रेरणेतून ही व्याख्यानमाला आयोजित करण्यात आली होती. या व्याख्यानमालेत ॲड. डॉ. उदय वारुंजीकर म्हणाले की, “पिंपरी – चिंचवड शहराची अतिशय झपाट्याने वाढ होत आहे. सातत्याने होणारी खाजगी बांधकामे, पीएमआरडीए आणि पूर्वीच्या म्हाडाच्या कक्षातील नागरीकरण, शहराच्या दोन्ही दिशेला असलेले कॅन्टोन्मेंट बोर्ड, राष्ट्रीय महामार्ग, रेल्वेमार्ग, शिक्षणसंस्थांचे जाळे, अनेक रुग्णालये अशा सोयी सुविधांमुळे नागरीकरण झपाट्याने वाढत आहे.
साहजिकच सुमारे ७५०० अनधिकृत बांधकामे, गुंठेवारी कायदा, विविध कायदेशीर प्रकरणांमधील नुकसान भरपाई अशा असंख्य समस्या निर्माण झाल्या आहेत. त्यामुळे वकिलांनी फक्त न्यायालयात येणाऱ्या खटल्यांचाच विचार करून व्यवसाय करण्यात अर्थ नाही. याउलट व्यवसायाची मानसिकता सोडून ज्या समस्या न्यायालयापर्यंत येत नाहीत त्यांचा शोध घेत त्यापर्यंत पोहचण्याचा प्रयत्न केला पाहिजे.
जातपडताळणीची एकूण एक लाख प्रकरणे लांबणीवर आहेत. असंख्य नागरिकांना अशा विविध प्रकरणांमध्ये कायदेशीर मदतीची गरज भासते, अशावेळी काही खाजगी संस्था ‘आम्ही कायदेशीर प्रकरणे सोडवू!’ अशी जाहिरात देखील करीत असतात. वास्तविक पाहता या संस्था पिंपरी – चिंचवड शहरातील अनेक वकिलांचे हक्क हिरावून घेत आहेत.
त्यामुळे वकिलांनी आपल्या चौकटीच्या बाहेर पडून आपल्या आसपास असलेल्या असंख्य संधींचे व्यवसायात रूपांतर केले पाहिजे!” असे मत त्यांनी मांडले.
पिंपरी – चिंचवड ॲडव्होकेटस् बार असोसिएशनच्या पदाधिकाऱ्यांनी या कार्यक्रमाच्या संयोजन केले असून असोसिएशनचे सचिव ॲड. गणेश शिंदे यांनी सूत्रसंचालन केले. ॲड. विश्वेश्वर काळजे आणि ॲड. सौरभ जगताप यांनी आभार प्रकट केले.
