मुळशी: जिममध्ये व्यायाम करत असताना हृदय विकाराचा झटका (हार्ट अटॅक) आल्याने तीस वर्षीय पैलवानाचा मृत्यू झाला आहे. या घटनेने कुस्ती क्षेत्रात एकच खळबळ उडाली आहे.
प्राप्त झालेल्या माहितीनुसार, पैलवान विक्रम पारखी (वय ३०) असं मृत झालेल्या पैलवानाचं नाव आहे. मुळशी तालुक्यातील माण येथील ते रहिवाशी होते. बुधवारी सकाळी माण येथील जिममध्ये ते व्यायामासाठी गेले होते. व्यायाम करत असताना त्यांना त्रास होऊ लागलायने त्यांना तात्काळ पिंपरी चिंचवड येथील रुग्णालयात दाखल करण्यात आले. मात्र उपचारपूर्वीच त्यांचा मृत्यू झाला.
पैलवान विक्रम पारखी यांनी कुस्तीची अनेक मैदाने गाजवली होती
पारखी यांनी वरिष्ठ महाराष्ट्र केसरी कुस्ती स्पर्धा तसेच अनेक राष्ट्रीय व आंतरराष्ट्रीय स्पर्धेत त्यांनी प्रतिनिधित्व करत पदके मिळवली होती. कुमार महाराष्ट्र केसरी किताब पटकावून मुळशीकरांच्या शिरपेचात मानाचा तुरा रोवला होता. तसेच अनेक कुस्ती मैदाने गाजवत मानाच्या गदा मिळवल्या होत्या. विक्रम हे माजी सैनिक शिवाजीराव पारखी यांचे चिरंजीव तर युवा नेते बाबासाहेब पारखी यांचे बंधू होते. त्यांच्या निधनाने माण गावावर तसेच पंचक्रोशीवर शोककळा पसरली आहे. महाराष्ट्र राज्यातील पैलवान, वस्ताद कुस्तीशौकीन हळहळ व्यक्त करत आहे.
