पुणे : पुणे महानगरपालिकेचे आयुक्त विक्रम कुमार यांनी बांधकाम विभागाच्या उपअभियंता, कनिष्ठ अभियंत्यांनी पुण्यातील सर्व बेकायदेशीर रूफटॉप हॉटेलवर कारवाई करावी आणि 15 दिवसांत माहिती सादर करावी अन्यथा अधिकाऱ्यांवर कडक कारवाई करण्यात येईल, असा इशारा दिला आहे. अशा भागातील हॉटेल्समुळे शेजारी राहणाऱ्या नागरिकांना मोठा त्रास होत असल्याच्या अनेक तक्रारी प्रशासनाकडे आल्याने हे पाऊल उचलण्यात आले आहे.
मिळालेल्या माहितीनुसार, विक्रम कुमार यांनी बांधकाम विभागासोबत बैठक घेतली. शहराच्या मध्यवर्ती भागासह उपनगरात रुफटॉप हॉटेल्स उभारण्यास सुरुवात झाली आहे. ही हॉटेल्स रात्री उशिरापर्यंत सुरू असतात. तिथे वाजणारी गाणी, ग्राहकांचा गोंगाट, त्यांच्या गाड्या यामुळे परिसरातील रहिवाशांना त्रास होत आहे. महापालिकेची कोणतीही परवानगी न घेता हॉटेल सुरू असतानाही ते बिनदिक्कत सुरू आहेत.
अनेक हॉटेल्सवर राजकीय प्रभाव असल्याने कारवाई अनेकदा टाळली जाते. मात्र, अनेक तक्रारी थेट आयुक्तांकडे आल्याने यासंदर्भात २२ ऑगस्टला (मंगळवारी) बैठक झाली. त्यात इमारतींचे साइड मार्जिन, फ्रंट मार्जिन, रुफटॉप टेरेसवरील हॉटेलचा मुद्दा उपस्थित करण्यात आला.
या हॉटेल्समुळे नागरिकांच्या जीवाला धोका तर आहेच, शिवाय या परिसरात राहणारे नागरिकही त्यामुळे त्रस्त आहेत. त्यासाठी ज्या रुफटॉप हॉटेलवर कारवाई करण्यात आली आहे, त्यांची माहिती १५ दिवसांत सादर करावी. अन्यथा यासाठी संबंधित उपअभियंता, कनिष्ठ अभियंता जबाबदार असतील, असे पीएमसी आयुक्त विक्रम कुमार यांनी सांगितले.
