पिंपरी: हॉटेलमध्ये बसण्यासाठी जरा सरका, असे म्हंटल्या असता भाईला तो अपमान वाटला. या शुल्लक कारणावरून टोळक्याने १७ वर्षाच्या मुलाला लाथाबुक्क्यांनी मारहाण करुन गंभीर जखमी केले.
ही घटना चिखली येथील चेरी चौकातील चाय गरम हॉटेलमध्ये रविवारी दुपारी साडेतीन वाजता घडला. १७ वर्षाच्या मुलाने याबाबत चिखली पोलीस ठाण्यात फिर्याद दिली आहे. त्यावरुन पोलिसांनी अजय राठोड, यश साठे, गौरव थोरात (सर्व रा. घरकुल, चिखली प्राधिकरण) यांच्यावर गुन्हा दाखल केला आहे.
पोलिसांनी दिलेल्या माहितीनुसार, आरोपी यांची टोळी ‘चाय गरम’ या हॉटेलमध्ये बसले होते. त्यावेळी एक १७ वर्षाच्या मुलगा चहा पिण्यासाठी हॉटेलमध्ये आला. बसण्यासाठी त्याने अजय राठोड याला जरा सरका, मला बसायला जागा द्या, असे म्हणाला. त्याचा या टोळक्याला अपमान वाटला. अजय राठोड या मुलाला म्हणाला, तू मला ओळखत नाही का?. मी अजय राठोड आहे. मला सगळे अज्जुबचकांड म्हणतात. हे माझे मित्र यश साठे व गौरव थोरात आहे. आम्ही सर्व घरकुल चिखलीमध्ये राहतो. आमचा कोणी नाद करीत नाही़ आणि तु मला सरक म्हणतो, असे म्हणून तिघांनी संगनमत करुन अजय राठोड याने फिर्यादी मुलाला शिवीगाळ करुन त्याच्या उजव्या हातातील कड्याने फिर्यादीच्या डोक्यात उजवे बाजूस जोरात मारुन दुखापत केली. यश साठे व गौरव थोरात यांनी फिर्यादी मुलाला हाताने व लाथाबुक्क्यांनी मारहाण केली. अमोल रोकडे हा भांडणे सोडवत असताना तिघांनी त्यालाही लाथाबुक्क्यांनी मारहाण करुन गंभीर जखमी केले. हवालदार कांबळे तपास करीत आहेत.
