पुणे: पुमा कंपनीचा लोगो वापरुन बनावट बॅग, टिशर्ट, स्पोट्स शुज, स्लाईडर चप्पल, जॅकेट, ट्रॉव्हझर, बॉक्सर पॅन्टची विक्री करणार्या कात्रज येथील दुकानावर पोलिसांनी छापा घालून ८ लाख रुपयांचा बनावट माल जप्त केला आहे.
लिपाणे वस्ती, आंबेगाव बुद्रुक, कात्रज येथील स्टाइलॉक्स फॅशन हब या दुकानमालकावर आंबेगाव पोलीस ठाण्यात कॉपीराईट अॅक्टखाली गुन्हा दाखल करण्यात आला आहे. पुणे शहरात वेगवेगळ्या ठिकाणी ब्रॅन्डेड कंपनीचा बनावट मालाची विक्री होत असल्याबाबतची माहिती पोलिसांना मिळाली होती. त्याअनुषंगाने पोलीस उपायुक्त निखिल पिंगळे यांनी गुन्हे शाखेच्या युनिट २ चे पोलीस निरीक्षक प्रताप मानकर यांना कारवाई करण्याचे आदेश दिले होते. पुमा कंपनीचे अधिकृत प्रतिनिधीमार्फत पुणे शहरात शोध मोहिम सुरु असताना. आंबेगाव बुद्रुक येथील स्टाइलॉक्स फॅशन हब या दुकानात बनावट मालाची विक्री होत असल्याची माहिती मिळाली. पुमा कंपनीच्या प्रतिनिधीच्या तक्रारीनुसार पोलिसांनी या दुकानावर छापा मारला असता, दुकानात मोठ्या प्रमाणावर पुमा या ब्रॅन्डेड कंपनीचे लोगो वापरुन बॅग, टि शर्ट, स्पोट्स शुज, स्लाईडर चप्पल, जॅकेट, ट्रॉव्हझर, बॉक्सर पॅन्टची विक्री सुरु होती. तेथून ८ लाख २ हजार ६०० रुपयांचा बनावट माल जप्त करण्यात आला आहे.
सदरची कारवाई सहायक पोलीस आयुक्त गणेश इंगळे यांच्या मार्गदर्शनाखाली पोलीस निरीक्षक प्रताप मानकर, सहायक पोलीस निरीक्षक अमोल रसाळ, पोलीस उपनिरीक्षक नितीन कांबळे, पोलीस अंमलदार शंकर नेवसे, अमोल सरडे, ओमकार कुंभार, संजय आबनावे, विनोद चव्हाण, साधना ताम्हाणे, विजय पवार, प्रमोद कोकणे, निखिल जाधव, गणेश थोरात, नागनाथ राख यांनी केली आहे.
