स्पा सेंटरच्या नावाखाली वेश्या व्यवसाय चालविणार्या बाणेर येथील मून थाई स्पावर भरोसा सेलच्या पथकाने छापा टाकून ३ महिलांची सुटका केली आहे व मॅनेजरला अटक केली आहे.
सताऊद्दीन मोहम्मद दिलवार हुसेन (वय २२, रा. जुनी सांगवी) असे अटक केलेल्या मॅनेजरचे नाव आहे. याबाबत अनैतिक मानवी वाहतूक व्यापार प्रतिबंध कक्षाच्या पोलीस हवालदार रेश्मा कंक यांनी बाणेर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, बाणेर रोडवरील महाबळेश्वर हॉटेल शेजारील बापूसाहेब मुरकुटे पाटील कॉम्प्लेक्समधील मून थाई स्पा येथे स्पाच्या नावाखाली वेश्या व्यवसाय सुुरु असल्याची माहिती बातमीदाराकडून अनैतिक मानवी वाहतूक व्यापार प्रतिबंध कक्षाला मिळाली. याबाबत खात्री करण्यासाठी पोलिसांनी बनावट ग्राहक पाठविले. या ग्राहकाने मिस कॉल देऊन पोलीस पथकाला इशारा केला. त्यानुसार पोलिसांनी मून थाई स्पावर छापा टाकत तेथे असलेल्या सताउद्दीन हुसेन या मॅनेजरला अटक करुन वेश्या व्यवसाय करुन घेतला जाणार्या तीन महिलांची सुटका केली. बाणेर पोलीस ठाण्यात मॅनेजरसह स्पा मालकावर अनैतिक मानवी वाहतूक व्यापार प्रतिबंध कायद्याखाली गुन्हा दाखल करण्यात आला आहे.
सदरची कारवाई कारवाई अपर पोलीस आयुक्त शैलेश बलकवडे, पोलीस उपायुक्त निखिल पिंगळे, सहायक पोलीस आयुक्त गणेश इंगळे यांच्या मार्गदर्शनाखाली भरोसा सेलच्या पोलीस निरीक्षक संगीता जाधव, पोलीस उपनिरीक्षक चव्हाण व त्यांच्या सहकार्यांनी केली आहे.
