पिंपरी चिंचवड प्रतिनिधी
पिंपरी चिंचवड शहरातील मोशी येथे गणरायाच्या विसर्जन उत्सवाला गालबोट लागले आहे. दि.२८ गुरुवारी सायंकाळी विसर्जन करत असताना एका पाच वर्षीय चिमुकल्याचा हौदात बुडून मृत्यू झाल्याची धक्कादायक घटना समोर आली आहे. अर्णव आशिष पाटील (वय ५, रा. मिंत्रा सोसायटी, मोशी) ,असे मयत मुलाचे नाव आहे. या घटनेने सर्वत्र हळहळ व्यक्त केली जात आहे.
या घटनेने पाटील कुटुंबावर दुःखाचा डोंगर कोसळला आहे. याबाबत अधिक माहिती अशी की,पिंपरी चिंचवड हद्दीतील मोशी परिसरात असणाऱ्या मिंत्रा सोसायटीमध्ये गुरुवारी गणपती विसर्जन करण्याचे काम सुरू होते. त्यात महानगरपालिकेकडून कृत्रिम विसर्जन हौद तयार करण्यात आला होता. अनेकजण या ठिकाणी गणपती विसर्जन करत होते. त्यावेळी अर्णव हा हौदाजवळ गेला. मात्र, हौदाजवळ गेल्यानंतर त्याचा तोल गेला आणि तो पाण्यात पडला.
त्यावेळी त्याला वाचवण्यात यश आले नाही. त्यातच त्याचा बुडून मृत्यू झाला आहे. मात्र, विसर्जनापूर्वी प्रशासनाने सतर्कतेचे आवाहन केले असतानाही केवळ एका नजरचुकीने चिमुकल्याला आपला जीव गमवावा लागला त्याने सर्वत्र हळहळ व्यक्त केली जात आहे. गणेश उत्सव मिरवणुकीत अनेक असे प्रकार घडताना आपण आपल्या आजूबाजुला पाहतो. मात्र गणपती विसर्जनाच्या या मिरवणुकीत या घटनेने गालबोट लागले आहे.
