पुणे | प्रतिनिधी
राज्यात दिवसेंदिवस गुन्हेगारीचं प्रमाण वाढलं आहे. त्यातल्या त्यात पुण्यात हे प्रमाण जास्त झालं आहे. पुण्यातील बारामतीत अशीच एक धक्कादायक घटना उघडकीस आली आहे. अंडा भुर्जी विक्री करणाऱ्याला केलेल्या बेदम मारहाणीत गंभीर जखमी झालेल्या युवकाचा उपचारादरम्यान मृत्यू झाला आहे. याप्रकरणी बारामती शहर पोलिसांनी हत्येचा गुन्हा दाखल करत प्रवीण भानुदास मोरे (वय ३६, रा. कल्याणीनगर, तांदूळवाडी, बारामती) याला अटक केली आहे.
३० सप्टेंबर रोजी शहरातील टी. सी. कॉलेज रस्त्यावर अंडा भुर्जी विक्री करणाऱ्या शाहबाज रौफ पठाण (वय ३२, रा. सदगुरुनगर, पाटस रोड, बारामती) हा नेहमीप्रमाणे आपला व्यवसाय करत असताना त्याला अज्ञाताने गंभीर मारहाण करत जखमी केले होते. या प्रकरणी पोलिसांनी अज्ञाताविरोधात हत्येच्या प्रयत्नाचा गुन्हा दाखल केला होता. उपचार सुरु असताना ८ ऑक्टोबर रोजी शाहबाज याचा मृत्यू झाला.
त्यानंतर अज्ञाताविरोधात पोलिसांनी हत्येचा गुन्हा दाखल केला. शहर पोलीस ठाण्याचे निरीक्षक दिनेश तायडे यांनी या प्रकरणाचा तपास करण्यासाठी चार पथके नेमली होती. गुन्हे प्रकटीकरण शाखेचे अंमलदार दशरथ इंगोले, अक्षय सिताफ यांनी तांत्रिक विश्लेषण, सीसीटीव्ही फुटेज आणि अन्य माहितीच्या आधारे या गुन्ह्याची उकल करण्यात महत्त्वाची भूमिका बजावली. प्रवीण मोरे याने दारुच्या नशेत शाहबाज याच्याकडे फुकट अंडी देण्याबाबत वाद घातल्याची माहिती पोलिसांना मिळाली.
त्यानुसार त्याला ताब्यात घेत चौकशी केली असता त्याने शाहबाज याच्यावर या कारणावरून प्राणघातक हल्ला केल्याची कबुली दिली. ही कामगिरी पोलीस अधिक्षक अंकित गोयल, अप्पर अधिक्षक आनंद भोईटे, उपविभागीय पोलीस अधिकारी गणेश इंगळे, पोलीस निरीक्षक दिनेश तायडे यांच्या मार्गदर्शनाखाली सहाय्यक पोलीस निरीक्षक आकाश पवार, अंमलदार रामचंद्र शिंदे, अभिजित कांबळे, इंगोले, सिताप, दादा जाधव, सागर जामदार, शाहू राणे आदींनी केली.
