हेल्मेट वापराबाबत व्यापक जनजागृती करण्यासाठी जिल्हाधिकारी डॉ राजेश देशमुख यांच्या संकल्पनेतून काल जिल्ह्यात प्रतिकात्मक हेल्मेट दिन पाळण्यात आला. प्रादेशिक परिवहन कार्यालय आणि पुणे शहर वाहतूक पोलीस शाखेच्या वतीने हेल्मेटधारी दुचाकीस्वारांचे चौक, शासकीय, निमशासकीय कार्यालयात गुलाबपुष्प देऊन स्वागत करण्यात आले, तर विनाहेल्मेट दुचाकीस्वारांना सावध करून दंडात्मक कारवाईला सामोरे जावे लागले.
जिल्हाधिकारी डॉ. देशमुख यांनी शासकीय अधिकारी व कर्मचाऱ्यांनी हेल्मेट वापराबाबत जनजागृती करण्यासाठी, लोकांना मार्गदर्शक सूचना देण्यासाठी आणि स्वत:ची व त्यांच्या सहप्रवाशांची सुरक्षितता सुनिश्चित करण्यासाठी हेल्मेट परिधान करून प्रतिकात्मक हेल्मेट दिन साजरा करण्याचे आवाहन केले. या अनुषंगाने आरटीओ आणि वाहतूक पोलिसांच्या वतीने शहरात जनजागृती मोहीम राबविण्यात आली.
आरटीओचे अधिकारी राज्य सरकारी, निमशासकीय, केंद्र सरकार आणि शहरातील सार्वजनिक उपक्रम कार्यालयांच्या प्रवेशद्वारांवर नियुक्त करण्यात आले होते. यावेळी हेल्मेटधारकांचे गुलाबपुष्प देऊन स्वागत करण्यात आले, तसेच उपस्थितांना जीव वाचवण्यासाठी हेल्मेटचे महत्त्व पटवून देण्यात आले.
हेल्मेट नसलेल्या व्यक्तींना जनजागृती कार्यक्रमाद्वारे हेल्मेट खरेदीसाठी प्रोत्साहन देण्यात आले, तसेच नियमानुसार दंडात्मक कारवाई करण्यात आली.
या मोहिमेसाठी पुणे शहर वाहतूक शाखेने विविध चौकांमध्ये अतिरिक्त कर्मचारी तैनात केले होते. प्रतिकात्मक हेल्मेट दिनाच्या उपक्रमात 51 चौक आणि शासकीय आवारात 43 अधिकारी आणि 500 पोलीस कर्मचारी सहभागी झाले होते.
पोलीस उपायुक्त (वाहतूक) विजयकुमार मगर यांनी जनजागृती मोहिमेद्वारे पोलीस हेल्मेट वापराचे महत्त्व पटवून देत असल्याचे प्रतिपादन केले. मोहिमेदरम्यान, हेल्मेटशिवाय वाहन चालवल्याबद्दल 1,626 दुचाकीस्वारांवर कारवाई करण्यात आली, परिणामी एकूण 8.13 लाख रुपयांहून अधिक दंड वसूल करण्यात आला.
