पुणे | प्रतिनिधी
नांदेडच्या शासकीय रुग्णालयात झालेल्या मृत्यूंबाबत हळहळ व्यक्त केली जात आहे. संबंधितांवर कारवाई करण्याची मागणीही मृतांचे नातेवाईक करत होते. शासकीय रुग्णालयात २१ वर्षीय बाळंतीण आणि तिच्या दिड दिवसाच्या नवजात बाळाचा मृत्यू झाला होता. या प्रकरणी डॉ शंकरराव चव्हाण शासकीय रुग्णालयाचे अधिष्ठाता डॉ श्यामराव वाकोडे आणि बालतज्ञ विरोधात कलम ३०४ आणि ३४ प्रमाणे ग्रामीण पोलीस ठाण्यात गुन्हा दाखल करण्यात आला आहे.
लोहा तालुक्यातील अंजली वाघमारे या गरोदर महिलेला ३० सप्टेबर रोजी प्रसूतीसाठी नांदेडच्या शासकीय रुग्णालयात दाखल करण्यात आले होते. दुसऱ्या दिवशी तिची नॉर्मल प्रसूती झाली. तीने कन्येला जन्म दिला होता. सुरुवातीला दोघांची प्रकृती चांगली असल्याचे डॉक्टरांनी सांगितले होते. मात्र दोन दिवसानंतर आई आणि बाळाची प्रकृती चिंताजनक असल्याचे सांगून डॉक्टरानी रक्त पिशव्या आणि अन्य औषधी मागवल्या.
औषधी आणि रक्ताच्या पिशव्यासाठी ४५ हजार खर्च आला. औषधी आणून देऊन ही उपचार दिले जात नव्हते .. तिथे डॉक्टर आणि नर्स नव्हते. याबाबत अधिष्ठाता डॉ श्याम वाकोडे यांच्याकडे तक्रार केली.उपचार करण्याची विनंती केली, पण त्यांनी प्रतिसाद दिला नाही . शिवीगाळ करुन हाकलून दिले. असं मयत अंजलीचे वडील कामाजी टोंपे यांनी आपल्या तक्रारीत म्हंटले आहे.
दरम्यान, शनिवारी बाळाचा मृत्यू झाला आणि त्यानंतर बुधवारी दुपारी अंजली वाघमारे यांचा देखील उपचारांदरम्यान मृत्यू झाला आहे. डॉक्टरांच्या हलगर्जीपणामुळे माय लेकीचा मृत्यू झाला असा आरोप कामाजी टोंपे यांनी केला आहे. दरम्यान या प्रकरणी कामाजी टोम्पे यांच्या तक्रारी वरुण ग्रामीण पोलीस ठाण्यात बुधवारी रात्री उशीरा रुग्णालयाचे अधिष्ठाता डॉ श्यामराव वाकोडे आणि अन्य एका डॉक्टराविरोधात हलगर्जीपणा केल्याचा गुन्हा दाखल केला आहे.
