पुणे: माथाडीच्या नावाखाली पैशांची मागणी करणार्या शेखर मारूती लोंढे (३७, रा. नागपुर चाळ, जुना जकात नाक्याच्या पाठीमागे, येरवडा) गुन्हे शाखेच्या खंडणी विरोधी पथकाने कारवाई केली आहे.
मिळालेल्या माहिती नुसार, येरवडयातील वुडन स्ट्रीट फर्निचर प्रा.लि. क्रियेटीसिटी मॉल यांच्या वेअर हाऊस वरून फर्निचर मटेरियल घेवुन आलेल्या ट्रकमधील फर्निचर तक्रारदार यांच्या कामगारांना खाली करू न देता त्यांची स्थानिक असल्याचे सांगुन लोंढेने आडवणुक केली. तक्रारदार यांच्याकडे प्रति महिना १८ हजार रूपये तसेच त्यांच्या कंपनीचे हाऊसकिपिंगचे आणि लेबर कॉन्ट्रक्ट स्वतःला मागुन त्यांना जीवे ठार मारण्याची धमकी देत होता. त्याबाबतची तक्रार गुन्हे शाखेच्या खंडणी विरोधी पथकाकडे प्राप्त झाली होती.
प्राप्त तक्रार अर्जाचा तपास केला असता आरोपी लोंढेने तक्रारदार यांच्याकडून १२ हजार रूपये घेतल्याचे समोर आले. लोंढे याच्याकडे तक्रारदाराच्या कंपनीची माथाडी संदर्भात कोणतीही वर्क ऑर्डर नसल्याचे तसेच तो माथाडी बोर्ड या ठिकाणी नोंदीत कामगार नसल्याचे देखील समोर आले आहे. पोलिसांनी त्याच्याविरूध्द खंडणीचा गुन्हा दाखल केला आहे.
अनधिकृत माथाडींडून खंडणी तसेच बेकायदेशीररित्या पैशाची मागणी होत असेल तर सर्व व्यापारी, व्यावसायिक तसेच कंपनी प्रतिनिधींनी त्यासंदर्भात पोलिसांशी संपर्क साधावा असे आवाहन पुणे पोलिसांकडून करण्यात आले आहे.
पोलिस आयुक्त अमितेश कुमार, सह पोलिस आयुक्त प्रविण पवार, अप्पर पोलिस आयुक्त शैलेश बलकवडे, पोलिस उपायुक्त अमोल झेंडे, सहाय्यक पोलिस आयुक्त सतिश गोवेकर यांच्या मार्गदर्शनाखाली; पोलिस निरीक्षक प्रताप मानकर, पोलिस उपनिरीक्षक मोहनदास जाधव, पोलिस अंमलदार विजय गुरव, संग्राम शिनगारे, सैदोबा भोजराव, अमोल पिलाने, चेतन चव्हाण, चेतन शिरोळकर यांच्या पथकाने ही कारवाई केली आहे.
