पुणे | प्रतिनिधी
पुणे, दि. ०४ : उद्या दि. ०५ सप्टेंबर हा दिवस भारताचे माजी राष्ट्रपती डॉ. सर्वपल्ली राधाकृष्णन यांच्या जन्मदिना निमित्त संपूर्ण देशभरात शिक्षक दिन म्हणून साजरा केला जातो.
पिंपरी – चिंचवडचे मा. आयुक्त तथा प्रशासक श्री. शेखर सिंह यांनी आज दि. ४ सप्टेंबर रोजी शिक्षक दिनाच्या पार्श्वभूमीवर पिंपरी – चिंचवड शहरातील वैष्णोमाता इंद्रायणीनगर प्राथमिक शाळा, भोसरी आणि कै. दत्तोबा रामचंद्र काळे इंग्लिश मिडियम स्कूल, काळेवाडी या शाळांना भेटी देऊन शिक्षक आणि विद्यार्थ्यांशी संवाद साधला.
तसेच शालेय विद्यार्थ्यांना प्रशासकीय कामकाजाचा प्रत्यक्ष अनुभव घेता यावा यासाठी महापालिकेच्या भोसरी येथील इंद्रायणी नगर प्राथमिक शाळेतील इयत्ता ७ वी मधील विद्यार्थी करण काकडे आणि काळेवाडी येथील दत्तोबा रामचंद्र काळे शाळेतील इयत्ता सातवीची विद्यार्थीनी अपेक्षा माळी या दोन विद्यार्थ्यांवर आयुक्त पदाची जबाबदारी सोपविण्यात आली.
दोन्ही विद्यार्थी आयुक्तांनी संत तुकाराम नगर येथील अग्निशमन केंद्राला भेट देऊन तेथील कामकाज कसे चालते, अग्निशमन विभागाची जनतेला कशी मदत मिळते याबाबत प्रात्याक्षिक पाहिले, तसेच तेथील अधिकारी आणि कर्मचाऱ्यांसोबत चर्चा केली.
एकीकडे विद्यार्थ्यांनी महापालिका आयुक्त म्हणून भूमिका केली तर दुसरीकडे आयुक्त शेखर सिंह यांनी महापालिकेच्या शाळांमध्ये जावून शिक्षकाची भूमिका पार पाडली. या अनुभवाबाबत बोलताना आयुक्त शेखर सिंह म्हणाले, ‘जॉब स्विच’ या उपक्रमांतर्गत मी आज एका शिक्षकाची भूमिका पार पाडली तर विद्यार्थ्यांनी माझ्या कार्यालयात जाऊन आयुक्तपदाची जबाबदारी पार पाडली. महापालिकेच्या इंद्रायणीनगर प्राथमिक शाळेत शिकवत असताना मी चांद्रयानाबद्दल माहिती दिली. विद्यार्थी भविष्यात इस्रोचा एक भाग कसे बनू शकतात आणि वैमानिक अभियंता कसे होऊ शकतात याबद्दल त्यांनी मला प्रश्न विचारले. विशेषतः मुलींना हे करिअर स्वीकारण्याची आवड आहे हे पाहून मला आनंद वाटला. आकांशा शाळेमध्ये विद्यार्थ्यांनी माझे शिक्षण, छंद, आवडते शिक्षक यांसारखे काही वैयक्तिक प्रश्न विचारले. त्यांच्या सर्व प्रश्नांची उत्तरे देताना मला खूप आनंद झाला असे सांगून या अनुभवाने मलाही विचार करण्यासारखे काही प्रश्न जाणवले जेणेकरून शहरातील एकूण शिक्षण पद्धतीवर काय बदल करता येतील याबाबत मला काही कल्पना सुचल्या असल्याचे आयुक्त सिंह म्हणाले.
