मराठा आरक्षणाचा मुद्दा राज्यभर गाजत असताना मराठा कुणबी, कुणबी मराठा जातीचे प्रमाणपत्र घेण्यासाठी आता सरकारी कार्यालयांमधून गर्दी होऊ लागली आहे.
त्यासाठी मराठा कुणबी, कुणबी मराठा नोंदी शोधण्याचे काम सुरू असून, आतापर्यंत शहरासह जिल्ह्यातील सुमारे २३ लाखांहून अधिक कागदपत्रांची तपासणी करण्यात आली. त्यापैकी सुमारे एक लाख ३५ हजार इतक्या कुणबीच्या नोंदी सापडल्या आहेत. या नोंदी सरकारी बेवसाइटवर अपलोड करण्याचे कामही सुरू झाले आहे. मनोज जरांगे पाटील यांनी मराठा आरक्षणाचा मुद्दा लावून धरला आहे.
या पार्श्वभूमीवर मुख्यमंत्री एकनाथ शिंदे यांनी कुणबी प्रमाणपत्रे देण्याचा आदेश जिल्हाधिकाऱ्यांसह विभागीय आयुक्तांना दिले होता. त्यानुसार सरकारी पातळीवर मराठा कुणबी, कुणबी मराठा नोंदीसाठी कागदपत्रांची तपासणीची मोहीम हाती घेण्यात आली. या नोंदीसाठी १३ प्रकारच्या कागदपत्रांच्या आधारानुसार, प्रमाणपत्र देण्याच्या प्रक्रियेत आवश्यक आणि अनिवार्य निजामकालीन पुरावे, वंशावळी, शैक्षणिक पुरावे, महसूल पुरावे, निजाम काळात झालेले करार, निजामकालीन संस्थानिकांनी दिलेल्या सनदी, राष्ट्रीय दस्तावेज आदी पुराव्यांची वैधानिक; तसेच प्रशासकीय तपासणी करण्यात येत आहे.
पुणे जिल्ह्यात आतापर्यंत सुमारे २३ लाखांपेक्षा अधिक कागदपत्रांची तपासणी करण्यात आली. त्यापैकी एक लाख ३४ हजारांपेक्षा अधिक कुणबी नोंदी सापडल्या आहेत. जिल्ह्यात सापडलेल्या कुणबी नोंदी या http://pune.gov.in या वेबसाइटवर अपलोड करण्याचे काम सध्या सुरू आहे. ज्या नागरिकांना कुणबी प्रमाणपत्र घ्यायचे आहे, त्यांनी वेबसाइटवर जाऊन या नोंदी पाहाव्यात. या नोंदी पाहून त्यात काही साधर्म्य असल्यास त्याचा उपयोग प्रमाणपत्र मिळण्यासाठी करून घेता येणार आहे, असेही जिल्हा प्रशासनाने स्पष्ट केले आहे.
