पुणे | प्रतिनिधी
पुणे,दि. २४ : नवरात्रीच्या शेवटच्या दिवशी दांडिया खेळताना झालेल्या वादातून तरुणाच्या डोक्यात बिअरची बाटली फोडून तीक्ष्ण शस्त्राने वार करण्यात आल्याची घटना सिंहगड रस्ता भागात रात्री घडली. अक्षय कांबळे (वय २५, रा. धायरी-नऱ्हे रस्ता) असे जखमी झालेल्या युवकाचे नाव आहे. कांबळेने याबाबत सिंहगड रस्ता पोलीस ठाण्यात फिर्याद दिली आहे.
याप्रकरणी तिघांविरुद्ध गुन्हा दाखल करण्यात आला असून, पोलिसांनी दिलेल्या माहितीनुसार, अक्षय दांडिया खेळण्यासाठी सिंहगड रस्ता येथे गेला होता. दांडिया खेळताना काठी लागल्याने त्याचा आरोपींशी वाद झाला, रात्री अक्षय आणि त्याचा मित्र आदित्य दुचाकीवरुन नऱ्हे-धायरी रस्त्याने घरी जाण्यासाठी निघाले होते.
त्या वेळी दुचाकीवरुन आलेल्या तिघांनी अक्षय आणि आदित्यला धडक दिली व त्यांना शिवगाळ करुन मारहाण केली. अक्षयच्या डोक्यात बिअरची बाटली फोडून त्याच्यावर शस्त्राने वार करण्यात आले. पसार झालेल्या आरोपींचा पोलिसांकडून शोध घेण्यात येत असून, पोलीस उपनिरीक्षक गणेश गोसावी तपास करत आहेत.
